سڤیل: سلێمانی

ئەم دیمانەی (سڤیل) لەگەڵ هیوا ئەحمەد مستەفا، بەرپرسی لقی چواری پارتی نەتوانرا بە راستەوخۆ ئەنجام بدرێ، بۆیە دوای ئەوەی چەند پرسیارێكمان بۆ نارد، ئەویش بەم شێوەیە وەڵامی پرسیارەكانی داوەتەوە.

سڤیل: كاتێك كارت لەكەركوك تەواو بوو، شتێكت بۆ خەڵكی كەركوك نوسی، ئێستا لەگەڵ دەستپێكی كارەكانت چی بەخەڵكی سلێمانی دەڵێی؟
هیوا ئەحمەد: ئەوەی كەركوك ماڵئاواییكردن بوو، بەڵام هەستم هەر لەگەڵیاندایە، بۆ سلێمانیش سڵاوكردنمە بۆ هاتنم بۆ ناو ئەو شارەی هەر لەمنداڵیمەوە سۆزم بۆی هەبووە و سەرمەستی شەقامەكانی ئەو شارە بووم، بەتایبەتی كاتی بەیانیان و ئێواران كە چەند بیرەوەرییەكی كەمن، بەڵام خۆشیم لەو دوو كاتانەدا لەشاری سلێمانی هەیە،

سڤیل: سلێمانی

ئەم دیمانەی (سڤیل) لەگەڵ هیوا ئەحمەد مستەفا، بەرپرسی لقی چواری پارتی نەتوانرا بە راستەوخۆ ئەنجام بدرێ، بۆیە دوای ئەوەی چەند پرسیارێكمان بۆ نارد، ئەویش بەم شێوەیە وەڵامی پرسیارەكانی داوەتەوە.

سڤیل: كاتێك كارت لەكەركوك تەواو بوو، شتێكت بۆ خەڵكی كەركوك نوسی، ئێستا لەگەڵ دەستپێكی كارەكانت چی بەخەڵكی سلێمانی دەڵێی؟
هیوا ئەحمەد: ئەوەی كەركوك ماڵئاواییكردن بوو، بەڵام هەستم هەر لەگەڵیاندایە، بۆ سلێمانیش سڵاوكردنمە بۆ هاتنم بۆ ناو ئەو شارەی هەر لەمنداڵیمەوە سۆزم بۆی هەبووە و سەرمەستی شەقامەكانی ئەو شارە بووم، بەتایبەتی كاتی بەیانیان و ئێواران كە چەند بیرەوەرییەكی كەمن، بەڵام خۆشیم لەو دوو كاتانەدا لەشاری سلێمانی هەیە، كە بۆ زوو دەگەڕێتەوە، بەخەڵكی سلێمانی دەڵێم (هاتووم لەڕێگەی بەرپرسیارێتی خۆم وەك بەرپرسی لقی چواری پارتی دیموكراتی كوردستان ئەوەی لەدەستم بێت خزمەتتان بكەم، دەنگی ئێوە بگەیەنم بە سەركردایەتی حزب لەجەنابی سەرۆك و جێگری جەنابی سەرۆك و سكرتێر و ئەندامانی مەكتەبی سیاسی پارتیمان، بۆ ئەوەی بە هەموومان كاربكەین، تاكو پێداویستیەكانی خەڵكی شار لەڕێگەی حكومەتی هەرێمی كوردستان چارەسەر بكەین و ئەوەیشی بەخۆمان بكرێت، وەك پارتی ئەوە خۆمان ئەنجامی بدەین)، بە خەڵكی شاری سلێمانی دەڵێم (پارتی هی هەمووتانە، ئەوە ئێوەن دەبێ ڕێنیشاندەر و ئامۆژگاری ئێمە بكەن و ئێمەش گوێتان لێ دەگرین)، پێیان دەڵێم (هاتووم هەست بكەم بە ئەركی سەرشانی خۆم، كە لەبۆنە خۆش و ناخۆشەكاندا لەگەڵتاندا بم و لەگەڵتان بژیم، وەك ئێوە بتانەوێ ئاوا رەفتار بكەم، بە سنگێكی فراوانەوە رەخنەكانتان، پێشنیارەكانتان، سەرنج و تێبینییەكانتان وەربگرم).
سڤیل: كاتێك ئەو پرسیارانە بۆ تۆ دەنوسم، مامۆستایەكی خەڵكی سلێمانیم لا دانیشتووە، دەڵێ لێی بپرسە جامەكانی لقی چوار هەموو رەشن، رەنگی رەشیش مرۆڤ دەخاتە حاڵەتێكی دەروونی و رەشبینییەوە، ئایا لەبەرنامەی دایە ئەو جامانە شەفاف بكات؟
هیوا ئەحمەد: سڵاوم بگەیەنە بەم مامۆستا بەڕێزەمان، پێی بڵێ بابەتی جامڕەش بوونی بیناكەمان پەیوەندی بەكاری ئەندازیاری و جوانكارییەوە هەیە، گرنگ ئەوەیە ئێمە وەك مرۆڤ بەگەشبینی لەژیان بڕوانین و دەروونمان سپی بێ، راستیەكەی بیرم لەو بابەتە نەكردۆتەوە.
سڤیل: لقی چوار بەو پێیەی كەوتۆتە سنورێكی زیندوو و پڕجولە، ئەركی لەچاو هەندێ لق قورستر دەردەكەوێ، بەرنامەتان چییە و چ شتێك لەئەولەویەتی بەرنامەتان دایە؟
هیوا ئەحمەد: دەمانەوێ بەكارەكانی خۆماندا بچینەوە، كەموكورتییەكانی خۆمان دەستنیشان بكەین و بەڕاوێژ لەگەڵ هەڤاڵەكانم چارەسەریان بۆ بدۆزینەوە و هێواش هێواش هەنگاوی كارا بهاوێژین، بۆ ئەوەی كەلێن و كەلەبەرەكان پڕ بكەینەوە، دەمانەوێ پەیوەندیمان لەگەڵ خەڵك بەهێزبكەین، بەشداری بۆنەكانیان بكەین و لەئازارەكانیان بەشداربین و هەوڵی چارەسەری گرفتەكانیان بدەین، دەمانەوێ ئەندامان و كادرانی پارتیمان بۆ جارێكی تر جۆش و خرۆشێكی تازەیان پێ ببەخشین و سەردانی بنەماڵەی شەهیدان و كەمئەندامان بكەین و ئەوەی لەتوانامان دابێت پشتیوانی لەداواكانیان بكەین، كە ڕەوان و مافی خۆیانە، زیندانیانی سیاسی هەمەجۆر بەسەر بكەینەوە، دەمانەوێ پەیوەندیمان لەگەڵ نوسەران و رۆشنبیران و هونەرمەندانی شارەكەمان زۆر بەهێز بكەین، بەبێ جیاوازی بیروڕای سیاسی گوێ لەئامۆژگاری و ڕێنماییەكانیان بگرین و كاریش بكەین، بۆ ئەو شتانەی ئەوان وەك بەرنامە هەیانە بۆ هەر یەكەیان لەبوارەكانی خۆیاندا، ئەولەویەتیش دەدەین بە جۆش و خرۆشدانەوەی ڕێكخستنەكانی خۆمان، بە گەنجان و وەرزشوانان و ئافرەتان.
سڤیل: لەهەڵبژاردنی 7ی ئازاردا، پارتی ئەنجامێكی خراپی بەدەستهێنا، لەدیراسەكردنی ئەو ئەنجامەدا پێتانوایە هۆكارەكان چین؟
هیوا ئەحمەد: پارتی 3 كورسی بەدەست هێناوە لەسلێمانی، بەنسبەت ناو شاریش ڕاستە چاوەڕوان دەكرا بەهێزتربین، بەڵام هۆكارەكان جاری بۆ من ڕوون نییە، چونكە من تازە هاتووم بۆ سلێمانی، پێشتر كارم لەسەر سلێمانی نەكردووە، وەك پێشتر ئاماژەم پێدا دەمانەوێ لەو هۆكارانە تێبگەین و چارەسەریان بۆ بدۆزینەوە.
سڤیل: هەندێ لەبەرپرسانی پارتی هۆكارەكەیان بۆ ئەوە گەڕاندەوە كە پارتی لەو سنورە دەسەڵاتدار نییە، ئایا ئەگەر ئەوە هۆكار بێت، ئێستا چ شتێك لەو بارەوە گۆڕاوە؟
هیوا ئەحمەد: ڕاستە ئەوە یەكێك بووە لەهۆكارەكان، بەڵام ئێستا ڕێكەوتننامەی ستراتیجی زیاتر و روونتر لەجاران ئاشكرا بووە كە لەنێوان (پارتی و یەكێتی) ئەنجام دراوە، بۆیە وای دەبینم ئەو گرفتە لەمەولا بەو شێوەیە نەمێنێ، چونكە فەرمانگە حكومییەكان باشتر یەك دەگرنەوە، ئێمە حیزبێكی قاچاخ نین لەو شارە، دەبێ پەیوەندییەكانمان لەگەڵ دامودەزگاكانی حكومی پەیوەندییەكی فەرمی بێت، لەدامودەزگای حكومیدا گوێ لەپارتی بگیرێ بۆ زیاتر خزمەتی شارەكە، ئێمە دەست وەرنادەینە كاروباری حكومەت، بەڵام لەڕا و پێشنیارەكانمان بۆ چارەسەركردنی گرفتەكانی خەڵك ڕاناوەستین و بێ ئەوەی خۆمان شلوێ بكەین و خەڵك دڕدۆنگ بكەین، كاردەكەین، هەوڵ دەدەین باشترین پەیوەندی خەڵك و دەسەڵات دروست بكەین.
سڤیل: رۆشنبیری ناسراو عەتا قەرەداغی لەدوایین ژمارەی (سڤیل)، باسی لەپێگەی پارتی لەسلێمانی و دەوروبەریدا كردبوو، رات بەرامبەر بۆچوونەكانی چییە؟
هیوا ئەحمەد: رێزم بۆ رۆشنبیری ناسراوی گەلەكەمان كاك عەتا قەرەداغی هەیە، زۆر لەو شتانەی باسی كردووە ڕاستە و تێبینیشم لەسەر كەمێكی هەیە، هەرچەند نایشارمەوە چاوم بە هەر نوسینێكی عەتا قەرەداغی بكەوێ دەیخوێنمەوە.
سڤیل: هەمیشە گلەییەك لەسەركردایەتی پارتی هەیە، كە نێوانیان لەگەڵ خەڵك دوورە، بۆ ئەمە لەو سنورە چی لەبەرنامەدایە؟ ئایا دەیەوێ كرانەوەیەكی زیاتر ئەنجام بدات؟
هیوا ئەحمەد: ئەو گلەییەش تا ڕادەیەك وایە، سەركردایەتی ئێمە لە (مەسیف سەلاحەدین)ە كە خۆتان دەزانن 3 كاتژمێر ڕێگەیە بۆ سلێمانی، بەڵام لەمەولا بەشێك لەمەكتەب سیاسی پارتی لەسلێمانی دەبێ و بەردەوام هەڤاڵانی تریش لەمەسیف سەلاحەدین دێن و سەرمان دەدەن و لەنزیكەوە چاودێری ڕەوشەكە دەكەن و لەمەولا ئەو دورییەی كە باس دەكرێت نامێنێ.
سڤیل: كردنەوەی لقێكی مەكتەبی سیاسی چ كاریگەرییەكی لەسەر پارتی دەبێت لەسلێمانی؟
هیوا ئەحمەد: كردنەوەی مەكتەب سیاسی كاریگەری دەبێت، چونكە ئێستا ئەوان بەردەوام لەشارەكە دەبن و لەگەڵ ئێمەدا ڕۆژانە كۆبوونەوەمان دەبێ و لەمەیدانەكە بوونیان دەبێت، بەڵێ كاریگەری باشی دەبێ و هەر كەسەشمان كاری خۆمان دەكەین و ناهێڵین ئیزدواجیەت لەكارەكان رووبدات.
سڤیل: بێگومان هەر شارێك تایبەتمەندی خۆی هەیە، پارتی لەدوو شار دەسەڵاتدارە، كە تەمەنێكی زۆرە لەرووی جەماوەرییەوە پێگەی بەهێزە لەو دوو شارەدا (هەولێر و دهۆك)، بەڵام كەم مامەڵەی لەگەڵ سلێمانی هەبووە، پارتی خوێندنەوەی بۆ ئەو سنوورە چییە؟
هیوا ئەحمەد: پێمانوایە ئەم شارە زۆر هەستیارە، چونكە خەڵكێكی زۆر لەڕۆشنبیر و هونەرمەند و نوسەر و سیاسیی گەورەی تێدایە، خەڵكێكی چاوكراوە و زیندوون، بەڵام لەهەمان كاتیشدا مەغدورن، پارتی لەم شارە بناغەی بەهێزی هەیە، بیناكردنیش لەسەر بناغەی بەهێز ئەگەر لەدیوارەكەیدا كەلێن و كەلەبەرێك هەبێ، جا گەورەبێ یان بچوك، زۆر ئاسانتر پڕ دەكرێتەوە، ئێمە خوێندنەوەمان وایە، دەبێ وەك خەڵكی ئەم شارە بیر بكەینەوە و ڕەفتار بكەین، دەبێ گوێ لە رای زۆرینە بگرین و دابەزینە خوارەوە بۆناو جەماوەر، بەتایبەتی ناو خەڵكی هەژار و كەمدەرامەت، ناو ڕۆشنبیران و نوسەران و هونەرمەندان و كاسبكاران و مامۆستایان و قوتابیان و كچان و كوڕان، بەتایبەتی گرنگی زۆر زۆر بدەین، بە گەنجەكانی شار، وەك ئەوان ڕەفتار بكەین و پشتیوانیان بین.
سڤیل: لەو سنوورەدا گەنج و رۆشنبیر و خەڵكی تریش رای خۆیان بە راشكاوی دەردەبڕن، هەروەها ئۆپۆزسیۆن زیرەكتر توانیویەتی سود لەو گەنج و رۆشنبیرانە وەربگرێ، ئایا پارتی بەنیازە هەمان مامەڵە و سیاسەت و تەكتیك كە لەهەولێر و دهۆك پەیڕەوی دەكات، لەسلێمانیش بیكات؟
هیوا ئەحمەد: وەك وتم ئێمە لەئۆپۆزسیۆن ناترسین، ئێمە بڕوامان بەو كوردایەتیە هەیە، لەهەموو وڵاتانی دنیا ئۆپۆزسیۆن هەیە، ئەگەر وڵاتەكە دیموكراتی بێ، بەڵام تێبینیمان لەسەر ئاڕاستەی ئۆپۆزسیۆن هەیە، هەوڵ دەدەین ئەو جموجۆڵەی ئۆپۆزسیۆن و ئەدای ئەوان و ئێمە و ئەو تێبینیانەی هەمانە لەشوێنێك نەمان گەیەنێتە (بنبەست)، دەبێ بە گیانێكی وەرزشی بوونی دەسەڵات و مافەكانی دەسەڵاتدار كە لەچوارچێوەی یاسادا ڕێكخراون و ڕێكدەخرێن و سەرچاوەیان لەدەنگی خەڵك بە ڕێگای هەڵبژاردنەوە وەرگرتووە، هەڵسوكەوتی لەگەڵدا بكەن، ئەگەر نیەتەكان بۆ باشتركردن بن، ئۆپۆزسیۆن كارێك دەكات خۆیان پێی گەورە دەبن، ئەگەر بە نیەتی تێكدان و شێواندنیش بێ، ئەوا پێی بچوك دەبێتەوە، چونكە میللەتی ئێمە قبوڵی ئاڵۆزی و پشێوی ناكات و قبوڵی كارەساتی ناوخۆ لەوانەی ڕابردوو ناكات، دەبێ بەهێمنی هەنگاوی بۆ بەرین بەژیرانە، خۆشبەختانە خەڵكی دڵسۆزیش لەهەموو لایەنەكان زۆرترن لەوانەی هەست بە بەرپرسیارێتی ناكەن، ئێمەش دنیایەك گەنجمان لەگەڵدایە، هەوڵ دەدەین زیاتر كەڵك لەوزە و توانایان وەربگرین و ڕایەڵەی تواناكانیان یەك بخەین، بۆ ئەوەی زیاتر خزمەت بە ئامانجە نەتەوەییەكانمان بكەین.
سڤیل: هەندێ راگەیاندن باسیان لەوە كرد، كە ئەو گۆڕانكاریانە ئاژانسی پاراستن كردوویەتی، ئەم گۆڕانكاریانە چۆن بڕیاریان لەسەر دراوە؟
هیوا ئەحمەد: هەندێ ڕۆژنامە و گۆڤار زۆر بە پەلەپڕوزێ شت بڵاو دەكەنەوە و راناوەستن راستیەكانیان پێ بگات، یان هەر خۆیان وا حەزدەكەن ئەوەیان شتێكی ترە، ئەگەر نا ئەم گۆڕانكاریانە چ پەیوەندیان بەئاژانسی پاراستنەوە هەیە!!؟ ئەم گۆڕانكاریانە گۆڕانكاری ڕێكخراوەین، واتە تەنزیمین، پەیوەندی بە مەكتەبی سیاسی بەڕێز و مەكتەبی ناوەندی ڕێكخستنەوە هەیە و ئەم بڕیارانە تازەنین، ماوەیەكە وەرگیراون و شەن و كەو كراون و پاشان دەست بەجێبەجێكردنیان كراوە، جا ئەگەر بەقسەی ڕۆژنامەكان بێت، یەكێك لەڕۆژنامە ناسراوەكانی هەرێم تا ئێستا وای نیشان داوە، كە گۆڕانكاری لەلقی 4 دا راگیراوە و نەكراوە، بەمەرجێك من لە1/6/2010 وە موباشەرەم كردووە و دەوامی خۆم دەكەم، ئەوەیان خۆت لێكی بدەوە، دەڵێن (ئەو كەسە كەسە ئەلفێكی بەسە)، ئێوەش ئەلفێكتان بەسە و دەزانن مەبەستم چییە، بڕوابكە ئەوە چەندە ڕاستە كە مەسئولی لقی چوار نەگۆڕاوە، تەدەخولكردنی ئاژانسی پاراستنیش هەر ئەوەندە ڕاستە لەو گۆڕانكاریانەدا.
سڤیل: دەگوترێ نێچیرڤان بارزانی چاودێری كارەكانی پارتی دەكات لەسلێمانی بۆ ئەوەی وەزعی پارتی لەو شارە بگاتە ئاستی پێگەی سیاسی ئەو پارتە، پێتوایە ئەمە رۆڵی دەبێت لەپێشكەوتنی پارتی لەو سنورە؟
هیوا ئەحمەد: جەنابی كاك نێچیرڤان بارزانی گرنگی زۆر بە شاری سلێمانی و خەڵكی سلێمانی دەدات، خەڵكی ئەم شارەی خۆش دەوێ، بەڕێزیان جێگری جەنابی سەرۆكی پارتییە و بە دڵنیاییەوە ئەوە ڕاستە و لەمەولا بەڕێزیان بە شەخسی بایەخی تایبەتی بە شاری سلێمانی دەدات و زۆریش دڵنیاتان دەكەمەوە، كە بەڵێ كاریگەری زۆری دەبێ لەسەر زیاتر بەرەوپێشچوونی پارتی لەشاری سلێمانی و ئاستی پارێزگاكەش بەگشتی.
سڤیل: لەرووی راگەیاندنەوە پارتی لەسلێمانی دەستكورتە، لەو رووەوە چیتان لەبەرنامە دایە؟
هیوا ئەحمەد: پارتی لەڕاگەیاندن دەستكورت نییە، كێ بەقەد پارتی دەستی ڕاگەیاندنی درێژە؟! بەڵام لێرە بەدوا دەبێ هێزی ڕاگەیاندنی خۆی لەسەر شاری سلێمانی چڕ بكاتەوە، بەڵام ئەوەمان بیرنەچێ، كە پارتی ڕاگەیاندنەكەی (جێگیرە) واتە هەڵپە ناكات و رێكخراون و ئەو رێكخراوبوون و دسیپلینەش جارجارە سلبیاتی هەبووە، كە بەدوای حەماسەتی خەڵك نەكەوتووە، بەڵام سیاسەتی پارتی بەجێگیری لەسەر رەوتی رووداوەكان هێشتۆتەوە، نەیهێشتوە توشی هەڵبەز و دابەزبێت، بەتایبەتی لەسەر مەسەلە نەتەوەییەكان و هەڵوێستە ستراتیژییەكان زۆر قایمە و ناگۆڕێ، بەڵام ڕاگەیاندنی پارتی لەسلێمانی هەیە، منیش لەگەڵ ئەوەم دەبێ كراوەتر لەگەڵ سلێمانی هەڵسوكەوت بكەین.
سڤیل: پێتوایە بۆ هەڵبژاردنی ئەنجومەنی پارێزگاكان پارتی بتوانێ لەو سنورە دەنگ زیاتر بێنێ؟
هیوا ئەحمەد: وای لێ ڕاساوین بۆ هەڵبژاردنی ئەنجومەنی پارێزگاكان پارتی دەنگی زیاتر بێنێ، هەرچەند ماوەیەكی زۆر كورتمان لەپێشە، بەڵام بڕوابكەن زۆر گەشبینم كە پارتی هەنگاوی گەورە بهاوێژێ، چونكە لەبەرنامەی ئێمەدایە خزمەتی خەڵك بكەین و ببین بە بەشێك لەخەڵك، پارتی زۆرترین دەنگی لەسەر ئاستی كوردستان هێناوە و زۆرترین دەنگی وەك حزب نەك وەك كوتلە لەسەر ئاستی هەموو عێراق هێناوە.
سڤیل: گۆڕان مۆڵەتی حیزبی وەرگرت، پێشتر نێچیرڤان بارزانی رایگەیاندبوو كە ئەگەر مۆڵەت وەربگرن بە رەسمی مامەڵەیان لەگەڵ دەكەین، ئایا ئەو گرژییەی ئەم دواییە كە بەهۆی تیرۆركرانی رۆژنامەنووس و قوتابیەك دروست بوو، كاریگەری لەسەر ئەم هەڵوێستە هەیە؟
هیوا ئەحمەد: من پێموایە برایانی گۆڕان لەزۆر شت پەلەیان كرد، كە ڕەوشەكە بەم شێوەیە نەدەویسترا ئاڵۆز ببێت، بەهەرحاڵ هەر دەبێ لۆجیكی سیاسی سەربكەوێ و سەرمەشق بێ بەسەر لۆژیكی ئاڵۆزی و قەلەقبوون و دڕدۆنگی و ساردبوونی دڵی خەڵك، هەموومان هاوزمان و هاونەتەوەین، بەڵام بە دڵنیاییەوە پارتی لەناخەوە ئازاری تەشهیری پێ گەیشت، چونكە تیرۆر و شەهیدكردنی ئەو برا ئەزیزە پێش هەموو كەس پارتی نیگەران كرد، ئەبوو بوەستابان تاكو ئەنجامی لێكۆڵینەوەكان ئاشكرا دەكرا، ئێستاش هەروا باشترە بواری لێكۆڵینەوە بدرێت، بزانین ئەنجامی بەچی دەگا. با لێ بگەڕێین لێكۆڵینەوەكان بگەنە ئەنجام باشترە لەجوڵاندنی سۆزی خەڵك بێ ئەوەی بنەمایەكی هەبێ، ڕەنگە جوڵاندنی سۆزی خەڵك بەشێوەیەكی كورت و كاتی وزەیەك بداتە ئۆپۆزسیۆن، بەڵام دوای دەركەوتنی ڕاستییەكان ڕەوتی رووداوەكان پێچەوانە دەبێتەوە، كە پڕكردنەوەی بۆ ئەوان زۆری دەوێ.